الفاردة أو القِطار تقول الحاجّة عنه: أهل العريس وقرايبه بِلايْموا بعضهم عشان يروحوا  يجيبوا العروس من دار أهلها، أيام زمان كانوا يزفّوا العروس على الفرس (الخيل)، يعني بِرشّحوا فرس أصيلة  للعروس،  والحزام اللّي عالفرس بِكون جديد، وكل إشِي جديد ومْدَنْدَش من رقبتها، وبحطُّوا عالفرس فَرشة، وبحطّوا فُوقِيها لْحَاف حَرير، وبَعدها بِركّبوا العروس على الفرس وبِقودها أخوها أو عمّها، بَسْ ابن عَمّها ما بِقُودها عَمَنُّه بِجوز يكون وِدُّه ايّاها، وبتِنْعزِم العروس وبتيجي عند  دار فلان ابن  فلان،  والقِطار مثل ما تقولِي عشرين زْمَالِةْ، والزّْمَالِةْ هِي فَرس ما بِتكون (أصيلة) زَيّ اللّي راكْبِه عَليها العَروس، وفيه مِنها حِصْنةْ وكُدُشْ وإشِي أصيلات،  بِركَبن نِسوان ثِنتين عليهن عَباية،  والفَرس الثانية عليها نِسوان ثِنتين  بِغَنّن، وهذُولاك نِسوان بِرُدّنْ عليهن،  وأول إِشِي يُوم يِطلعن من عند أهل العروس بِقولن:

كَثّر الله خِيركو، يِخلِف عليكو، كَثَّر الله  خِيركو،  ما لَقِينا غِيركو، هِيلَ الاجواد اَبُوها.

وبَس  يِقِبْلِن على العزَّام، بِقولن:  افتَحِلنا البابِ الشّمس اَحْرَقَتنا.