هي كلمات تُغنّى في العرس عندما كانت تُوضَع الحِنّا على إيدين العروس، فتتجمَّع النساء عليها   وتغنّيها برِفقة الطَّبلة، ومنها:

سَبَّلْ عْيُونُه ومَدّ إيدُه  يِحَنُّونُهْ

غَزال زْغَيِّر بِالمِنديل يْلُفُّونُهْ

يا امِّي يا امِّي  عَبِّيلِي مَخَدّاتِي

طَلَعْت  منَ الدُّور مَا وَدّعت  خَيَّاتِي

سَبَّلْ عْيُونُه ومَدّ إيدُه  يِحَنُّونُهْ

غَزال زْغَيِّر بِالمِنديل يْلُفُّونُهْ

يا لُمِّ يا لُمِّ، طَوِّيلِي المَنَادِيلِ

وطْلَعْت  منَ الدُّور ومَا وَدّعت  انا جِيلي

وطْلَعْت  منَ الدُّور ومَا وَدّعت  انا أمّي

أنا الغريبةْ  وهِيلُوا  يا دَمْعاتِي

سَبَّلْ عْيُونُه ومَدّ إيدُه  يِحَنُّونُهْ

غَزال زْغَيِّر بِالمِنديل يْلُفُّونُهْ

يا الاهْلِ لا يُجْيُرْ لَكُم خاطِر

شو يَلِّي  عَمَاكُو عَن ابِنْ عَمِّي هَالشَّاطِر

يا الاهْلِ يا الاهْلِ ما نِبْرِي لَكم  ذِمِّةْ

شو يَلِّي  عَمَاكُو عَن ابِنْ الخَالِ والعَمِّ

أوِيها.... بْحِنَّا مَكَّهْ جِيتَ احَنِّيكِ

أويها ..... يا بَدر ضَاوي والحَلا كله لِيكِ

أويها .... ما بتِلْبَقْ الحِنّا إلّا  لَإيدِيكِ

أويها ... يا صَبْحَا زِينة العَرايِس لَمْحَمَّد اوَدِّيكِ