في أسبوع العرس، تحديدًا قبل الزفّةْ في يُوم، ليلة وداع العروس بيجُوا أهل العريس هالنِّسوان وبِجيبِن مَعْهِن حِنَّةْ وبحنِّن أدِين العَرُوس،  وبِغَنّن عِندها وبِرَوّدِن عندها، وبِقولن:

مِن بنات الحُوشِ يا جَميلَةْ                من بنات الحُوشِ يا هِيهْ

ما تِريدَ الغُوشِ حَيِيَّةْ                      ما تِريدَ الغُوشِ يا هِيهْ

ولُمِّي يا لُمِّي وحَشِّيلِي مَخدّاتِي           طَلعت منَ البِيت ومَا وَدَّعت  خَيَّاتِي

دَنِّ القَلَم  وَابْيَضَ القِرْطاس            وِبْخَاطِرِي نَظِم بِيتينِ

والشِّقِّ لَنُّه انْبَنى رَنَّتْ فَناجِينُه       شِيخٍ بَلا عِزوةٍ قَلَّتْ مَراجِيلُهْ

وبمدُّوا هالحِلو  وبزغردن عند العروس وبِدِبْكن وبُرُقصن، وبعدين عاد بروّحن.