الدِّحِّيّة كانت نوع من أنواع الرقص اللّي بنرقصُه في الأعراس، طبعًا وِدْها لَمّةْ، وهي عادة قديمة بطَّلَت كثير موجودة هَسَّا. بالدِّحِّيّة يكون فيه صَفِّين مِتقابلِين مع بعض، وبكون فيه (بَدَّاع) في النُّصّ اللّي هو يقول الشِّعر أو اللّي يقول (البَدْعَةْ). وبالدِّحِّيّة يكون نِصفين من الإيدين لتحت مع حركة في الرِّجلين لَوَرَا ولقدَّام، وبِتجي (الحاشي) اللّي هي المَرَةْ اللّي بتُدخل في النُّصّ بيناتنا بدون ما نِعرف مِين هي، بتكون ملثَّمة ولازم تكون حاملة عَصَايه في إيدها، وبتصير تِتحرك قدَّامهم، بعدين بتِرجع لبيت الشَّعر وبترجع بتيجي وحدة غيرها. هسَّا طبعًا ممنوع تفوت المَرَةْ على الدِّحِّيّة لأنّه صِرنا نعرف في الدِّين أكثر من أوّل.

طبعًا كلمات الدِّحِّيّة هي:

*هَلا هَلا بِك يا هَلا        لا يا حَليفِي يا وَلَدْ

هَلا هَلا بيك يا هلا        يا الذَّالي شُقر الذّوايِب حَدالِي

يا رِيت ابُوكِ خَيَّ اَبِي      يا رِيت اَبُوكِ عَمًّا لِي

*أوّل ما نِبدى بالألْفِ      مِير اَدَرِّج عَنَّك مِن حِلفِي

وِبْعَقلي مَانِي مِخْتلْفِ          كَتبت كْتَابي بِيدَيَّا

البَا بَوَّابَةْ مَفتوحة              يا قَلبي فَتَّح جْرُوحَةْ

أَرْزِم رْزُومَ المَسمُوحَةْ      بُوقان يْبُوقَ اللّي يْخُونَهْ

الجِيم جْرُوحي غَميقة        صَديقٍ يِعْلِم صَدِيقَهْ

اليَا يا بُعْد الحَقِيقَةْ           لا مِنَّهْ ذَنْب وْلَا سِيَّهْ