يُوم طلعة العروس من دار أهلها بِجُوا أهل العريس قطارات ( يَعني جايِّين في قطار فَاردِهْ لأخذ العروس) بِفُوتُوا على دار أبوها بِغَنّن وبقولن:

وافتحُوا لنا البابِ يا بَيِّي مْحَمَّد        وَاَهَلنا غْيَابِ والشَّمس اَحْرَقَتْنَا

رَحِّبِي بِضيُوف ابُوكِ يا عَرُوس اُمَّ الاسْوارَةْ

يا هَلا بِضيُوف اَبُوي لَو كانُوا مَلَاتِ الحَارَةْ

رَحِّبِي بِضيُوف ابُوكِ يا عَروس اُمَّ الاكْلِيلِ

يا هلا بِضيُوف ابُوي لَو كانوا مْنَ اَهْلِ الخَلِيلِ

وِاتْحَمَّلُونا دَقايق وِاتْحَمَّلُونا دَقايق يَا

سَاعة وَدَاعِ الرَّفَايِق يا سَاعة وَدَاعِ الرَّفَايِق يا

تْحَمَّلُونا ساعاتِ، وِتْحَمَّلُونا سَاعاتِ يا

ساعة وَداع البَنات ساعة وَدَاع البَنات يا

ياللِّي على اللُّوجِ فِزِّي، ياللِّي على اللُّوجِ فِزِّي يا 

والقَعدة قَعدةَ العِزِّ، والَقعدة قَعدة العِزِّ يا

وياللِّي على اللُّوجِ مِيلي، ياللِّي على اللُّوجِ ميلي مِيلِي يا

والقعدة قعدة أميرة، والقَعدة قعدة أميرة يا

ويا بِنت مَن هُم خَوالك، يا بِنت، مَن هُم خَوالك؟ يا

وِخْوالِي يا الكَركِيّة، وِخْوَالِي يا الكَركِيّة يا

ما يِقبلُون الرَّدِيّة، وما يِقبلُون الرَّدِيَّة يا

وما يِذبَحُونِ اِلَّا الثَّنِيَّة، وما يِذْبَحُون الا الثَّنِيَّة ويا

ومَصحوبةً بالزغاريد والكَفّ والزَّقفة الواحدة

هسّا يرُدَّن قَرابات العَروس عِنْدْها بِقُولن:

حَلفتْ يا حَلا ما تِطلَع مِنْ حَالْها       إلّا بْسَيّارَة وِيْبَارِيها خَالْهَا

حَلفتْ يا حَلا ما تِطلَع مِنْ يَمّهَا       إلّا بْسَيّارَة وِيْبَارِيها عَمّْهَا

بعدِين يِجِي أكبر واحد في العيلة مِشان يِطلع العروس من دار أبوها، يِمكن إذا جدها عايش إِلُه الأولوية يطلعها، وإذا مو موجود بِطلعها خالها أو عمّها إذا كان أكبر من أبوها في العم،ر وبُحُطّ عَبَاتُه على العروس وبِطلعها.

فبغَنّن النّسوان من أهل العريس وبقولن:

يِخلِف على ابُو محمَّد        يِخْلِف عَليه بَالاوَّل

طَلَبنا النَّسّبْ مِنُّه            أعطانا غَزَال مْصَوَّر

طَلَبْنا النَّسَب مِنُّه           أعطانا بَناتُه الثِّنْتِينِ

وكثَّر الله خِيركوا ويِخْلِف عَليكُو