هذا يوم يِنْزَفّ العريس بِقُوموا الزّلَام هالشِّيَّاب وبِجيبوا العريس من عند العزَّام وبِصيروا يغنُّوا، وِيش يقُولوا:

عِيناكِ يا القُدس الشّريف

عَيُّوا عليكِ رْجَالكِ

يا بِنِت غَدِّي مْهِيرَتِي

تَسْلَمْ وَانَا خَيَّالَها

لَشْرِي لَهَا سَرْجٍ جَديد

ورِيشَ النَّعَامِ جْلَالَها

يا فْلان يا جَبْهة حَرير

تِزهِي على لَبَّاسَها

يا بِنت ياللّي بِالجَبل

طِلِّي وشُوفِي فْعَالَنا

خَلِّيه يِمُوت خَلِّيه يِمُوت

خَلِّيه يِزُورَ المَقبرةْ

يا بِيضِ لا تِنْعِن عَليهْ

هَذِي مَنايا مْقَدَّرَةْ

وكنّا يُوم نرُوح نْجِيب العروس من عند أهلها يكونوا الزّلام بغنُّوا أو بطبخوا، والقطارات بِكون ثلاث نِسوان في عباة مِتْجَسْيات في العُبي، وثلاثة بقُولن وثلاثة بردُّوا عليهن، ويُوم يِقبلن على بِيت أبو العروس بِصيروا يغنُّوا لِيه ويستقبلونا، وِيش يقولوا:

فتحنا الباب يا بَيِّي فْلانهْ فَتحنا الباب

وَاهَلِينا غْيَاب

الشّمس حَرْقتنا

وَاهَلِينا غْياب

وبقوموا بِستقبلوا النّسوان، وبتقوم الزّغاريت لمّا الزّلم يطلبوا عروستهم، وِاحْنا عند العروس بِنْغَنّي ليها:

يا رْوِيدِتنا يا رِيما

يا رْوِيدِتنا يا هِيهْ

من بَنات الحُوشِ يا رِيما

من بنات الحُوشِ يا هِيهْ

ما تْطِيقِ الغُوشِ حَيِيِّةْ

ما تْطيقِ الغُوش يا هِيهْ

وكَمان بصِيرن يغنِّن:

وَسِّعُوا المِيدانِ يا بَيِّي فْلان وَسِّعوا المِيدانْ

والفَرحة لَلصِّبيانِ والعِزّ لَكُم والفَرحهْ لَلصِّبْيانْ

ويُوم تِطلع العروس بِنقول:

كَثَّرَ الله خِيركُوا

وْيِخْلِف عَلِيكُوا

كَثَّرَ الله خِيركُوا

وبنُوخذ العروس وبِنروح فيها وسلامتكِ.