هو عمليّة تَحمِيس القَهوة لتصبح جاهزة للطَّحن وإعداد مشروب القهوة العربية، وبحسب الرّاوية الإخبارية في حديثها عن طريقة إعداد القهوة وحَمسِها فإنّها تقول:

قَبل ما تِطلع الشّمس أوّل إِشِي بِنْوَلِّع النّار، وبعدها بِتصير جَمر وبِنكون مجَهّزين القهوة الخضرا، وبِنَّقِيها من الحبّة السُّودا والحجار، وبِنحُطّ القهوة في المِحْماسة، وبِنصير نِحْمِس فيها خَمس لعشر دقايق، لمّا لونها يِعطي على سواد مثل لُون المِدْرَقَةْ بِنْذَرِّيهَا وبنُنْشُرْها في الهَوا عَشَان تصير باردة؛ لأنّه ما بِصير ندُقّْها وهي حامية؛ لأنها بِتْعَجِّق على بَعضها. كُنّا زَمان نحُطّها في (المِيداوة) وهي عِبارة عن قطعة خشبيّة مفتوحة من الأعلى ومُقعّرة من الأسفل توضع القهوة بها، حيث نقوم بعملية الهَزّ وبعدما تبرد القهوة بِنحُطها في قطعة قماش وبنُفْرُكها مِشَان تِطلع قِشرتها؛ لأنّه بِتخَرِّب الطَّعم، بعدين بِندُقّها في المِهباش، بعدين على الهاون بندُقّها لمّا تصير ناعمة مع شويّة هِيل، وزمان كُنّا نكثِّر الهِيل بس هسَّا صار غالي، والنّاس ما بتِشربها إلا هِيلها كثير عَشَان تعدِّل الرّاس، بعد غليها بنحُطّها في طبّاخ القَهوة بِنْخَلّيها تِعْقِد، وبعدين بِنْحُطّها في الدلّة لمّا تُرْكُد (أي تُرْكُز داخل الدلّة) بِنْصُبّها للحاضرين.