أنواع فناجين القهوة عند البدو:

 القهوة من أهم عادات الضّيافة والكرم عند البدو، ويجب أن تكون موجودة في كل مناسبات البدو. وأنواع الفناجين هي كما يقول الحاجّ عبد الله العطوي:

 الفِنجان الأول (فِنجان الهِيف): وهو الفنجان اللّي بِشربُه المعزِّب قبل ما يمُدّ القهوة لضيوفه عَشان يتأكّد منها لا تكون صايدة.

الفنجان الثاني (فنجان الضّيف): وهو الفنجان الأوّل اللّي نقدمه للضّيف، ولازم يشربُه إلّا إذا فيه عداوة بينهم، أو يكون للضّيف طلب عند المعزّب وما يشربه إلا بعد ما يوخذ وَعد من المعزّب إنّه يقبل طلبه، وإذا المعزّب ما نفّذ وعده يلحقه العار بين العرب.

الفنجان الثالث (فنجان الكِيف): وهو الفِنجان الثاني اللّي نقدّمه للضّيف، وما هو مَجبور يشربه.

الفنجان الرابع (فنجان السِّيف): وهو الفنجان الثالث اللّي نقدّمه للضّيف، وإذا شِربُه بِصِير مع المعزّب على الخِير والشَّرّ، يعني خَوِي وحَامِي، وأغلب الأحيان الرّجال بِتْحَاشُوا هذا الفِنجان لأنّه بمَثابة وَعد وكِلمة لازِم تلتزِم فيها.

والقرايب وعيال العَمّ للمعزب دايمًا هُم اللّي يِشربوا أكثر من ثلاث فَناجين لأنهم عَرَب وَحْدة.