كنّا يُوم أبوي ينادي على مَوعد الغَدا كان كلّ واحد في العيلة يفِزّ يرُدّ على أبوي بسرعة عشان نِتجمَّع عالأكل، واللّي ما بِكون قاعد عالغدا كان يِنكَتِل في الخِيزرانةْ ... ، ممنوع حدا فِينا يِحكي على الأكل أو يِهمس، وكان عِنّا ثلاث وجبات رئيسيّات :الصُّبح بعد الفجر وجبة الفطور، وبَعد الظُّهر وجبة الغدا، وهي كانت أهم وجبة، وعالغروب وجبة العَشا وهي أهمّ كَمان من وجبة الغَدا، لأنّه الحصّادين بِجُوا عالغروب للنّوم،  وكنّا نِتعَشّى بكِّير لأنّنا كنّا ننام بكّير عَشان السَّرْوَةْ  عالحصادة وقت موسم الحصاد والدّْرَاسَة ...، وعالفطور كانت أمّي تحُطّ من النِّمْليّة، تْطُول وتْحُطّ لِينا مَقدوس ومخَلّل وزِيت وزَعتر وتَطلِي وتِين، وتفقِس بِيض من الجاجات، وتفقسه في سَمنه بلدية وإبريق هالشّاي. وعالغَدا تِجِي يُوم تسوِّي شُورَبَة عدس، ويوم مجدَّرَةْ، ويوم مَدقُوقَة، ويوم الجمعة مَنسَف، وعالعَشا نُوكل بَندوره مع خبز، أو تحُط عشَا من حواضِر الدّار وسلامتكي.