ومن العادات المشهورة عند أهالي الكرك النّخوة، وكما حدّثنا المُخبر معناها الفَزْعَة، يعني إذا واحد مَضيُوم او انْضَام او انظلم وبِطلُب النّخوة أو الفزعة بِنتَخُوا لُه قَرايبه وأصحابه وأهله، وما بِصير ومن العيب رَدّ النَّخوة وعدم تَلبيتها، واللّي ما بُرُدّ النّخوة يُعتبر نَذْل. وكانت زَمان النّخوة فيها سِيل دَمّ ودَفع مَصاري لَلّي بيقوم بالنّخوة، وما كانو يناموا اللّيل إلا إذا نَصَرُوا المظلوم.  ومن قِصص النّخوة إنّه فيه شَبّ كان بدُّه يِتجَوّز بِنت شِيخ وأبوها مِش موافق، وآخِر إِشِي انتَخَى بشِيخ من شيُوخ العُربان، ولبَّى الشّيخ نَخوته وراح على الشِّيخ أبو البِنت ولبّى طلبه للشَبّ وتزوّج البِنت، وهيك كانت النّخوة زَمان من العادات المُتعارَف عليها عند أهالي الكرك.