تُحدّثنا المُخبرة عن أهمّ الصفات التي تميّز سكّان محافظة الكرك وهي إكرام الضّيف، فتقول:

كانت عادة إكرام الضيف إلها طقوس أكثر من هسّا، يعني صحيح هسّا بنِكرم الضيف، بسّ زمان غِير؛ كنّا لازم نلاقي الضيف في الوجه البشوش، ونوجّبُه في طريقة نحسِّسُه فيها إنّه حابّين جِيتُه علينا زيّ ما يقول المثل (لاقِيني ولا تغدِّيني)، لازِم نكرمه ونقدّم له أحسن إشي عنّا في الدار، المهم يكون الضيف مِرتاح، وإذا كان جاي لأنه محتاج شَغلة أو مساعدة ما لازم نردّه خايِب ونسوّيه ليه. وكمان الضيف كان لازم يكون رَزين وما لازم يسُولف كثير أو يِنتقد.

وبس تِنتهي الضيافة ويكون وِدّه يروح لازم نودّعه في طريقة حِلوة واحنا بنِضحك في وجهه، وهو لازم يردّ علينا في لسان حِلو وما يكون عابس الوجه.