زيارة المريض من أهمّ العادات الموجودة سابقا وحاليا في منطقة الأغوار؛ حيث يأتي الناس على شكل مجموعات وعشائر لزيارة المريض والدعاء له بالشفاء وإحضار الهدايا.

لمّا يِمرض واحد بكون في المستشفى أو في الدار، بروح الناس عليه لزيارته وتهنئته بالسلامة، ولمّا يكون المريض في مستشفيات عمّان الناس بِجَمّعوا حالهم وبُوخذوا باص طَلَب ويتقسّم الإجار على الجميع، وهيك بِتقِلّ التكاليف على الناس.

وإذا كان المريض في بيته بروحو الناس عليه مجموعات للزيارة، ولمّا يفوتوا على بيته بِقولوا له: الحمد لله على سلامتك، وقبل ما يفوتوا الدار على المريض بقول أكبر واحد في المجموعة: ما عليكو شرّ.

برُدّ أهل المريض: ما تشوفوه، تفضَّلُوا.

وبقعدوا عند المريض ساعة أو أقل، وبقولوا للمريض :الحمد لله على سلامتك، شِدّة وتزُول، والمَرض رحمة من الله، أو كفَّارهة وطَهُور من الله تعالى.

وهذه العادات موجودة من زمان، وهذه الأيام زادت لأن الناس صار عندهم سيارات، وصارت المسافات قريبة والتنقّل أسهل، وصار الناس يوخذوا معاهم وخصوصا النّسوان طَلَة على المريض، والطَلّة بتكون إمّا بيض أو تفّاح أو موز أو ببسي كبير أو عصير، ...  يعني كلّ واحد حَسَب قدرته، وفيه ناس بِعْطِي المريض مصاري لتخفيف المصرف عليه في البيت ومساعدته.