الشّمع مهم كثير عند المسيحيّين لأنّه ما فيه مناسبة في الصلاة بتِخْلى من الشّمع، وبنِضويه في العماد والأعياد، وكلّ ما نروح على الصلاة لازم نِضوي شمع قدّام صور المسيح أو قدّام صور القديس، واحنا بنِضوي بِنصَلّي وبنقول طِلبتنا اللّي بِتهِمنا وبِنحبّ نُطلبها في الكنيسة، وبنقول: الربّ نُوري وخَلاصي، فمَنْ أخاف لأنّك يا ربّ سوف تضيء حياتي؟ والشّمعة ترمِز إلى أنّ الله هو نور إلْنا، وضَوّ الشّمع الخافت يرمِز للخشوع والرهبة، ولمّا يِنْضوي الشّمع قِدّام صُوَر القِدّيسين يرمز إلى أنّهم كانوا نور في حياتهم وعيشتهم، والخيط داخل الشّمعة يدلّ على نقاوة قلوب القدّيسين، وإنّه لمّا تذوب الشمعة بِتْمَثِّل القديسين في عطائهم وتضحيتهم من أجل الربّ والناس، وإنهم نور العالم، عشان هيك هي مهمّة وبِنظَلّ دايمًا نِضويها في كلّ المناسبات الحلوة من أعراس وعماد وغيرها، وكمان في البيوت قدّام الصُّوَر أحيانًا.