أهم وجبة كانت وجبة العَشا؛ لأنه اللّي بُحْصُد واللّي بِيجي من الكروم ومن الحصاد، وبِجوا هالزّلام بقُعدوا في الشِّق وبِتعلّلوا والشِّق بيت شَعر طويل وفيه ستار بِنسَمّيه (الساحة)، وهالساحة بتِقطع البيت قِطعتين، والرجال لحال والنسوان لحال، وكنا نسوّي جَرِيشة (عِيش وبنحُطّ عليه سَمنة بلديّة). ومرّات الزلام ما بكونوا في الدار، بكونوا معزومين على لحم ومناسف، وبروحوا بسّ بِظل الشِّقّ فاتح لَيِيجي ضيف، وإن جا هالضيف وما كان فيه زُلُم في الدار بِبعثن هالنّسوان على زَلمة من العرب، وبِجن يِذبحن من الخِرفان، وبطبخن اللّحم وبُمُرْسِن اللّبن وبِسوّن مناسف للضّيوف.