أيّام زمان أيّام العُربان والعِيشة القديمة اللّي كانوا فيها الناس عايشين في بيوت شَعر وما عندهم لا كهربا ولا مَطبخ ولا غاز، وكانوا الناس يُطبخوا على الحَطَب، وكلّ يوم بِطلعن النِّسوان على البَرّ وبِدَورِن حَطَب (عِضى وشِيح)، ويِجمعنّه  ويِحزمنّه في حزام الحَطب، واللّي معاها حمار تحمّله عليه، واللّي ما مَعاها كانت تِحمله على خَصرها، ولمّا تصل فيه تحطُّه عند النار، وتطقّشُه وترتّبُه ويكون جاهز لمّا تُطبخ أو تسَوِّي قهوة، أو لمّا تسخِّن الحليب أو الرّايب، أو لمّا تِجِي تقشِّد السَّمن.

أيّام زمان راحت وراح معْهِن جَدّاتنا اللّي كانِن يِشتغلن ويِتعبن، ويقومن في دُورهن وعيالهن.