لمَّا يقوم أهل العريس بِغَزّ البِيرَق والأعلام ويِعزموا مَعارفهم وأصدقائهم وقرايبهم على فَرَح ابنهم، بِيجو جِيرانهم وبطلبوا من أهل العريس (وَهْد) العَريس اللّي وِدُّه يِنْزَفّ فيه، فالجار اللّي بُوخِذ وَهْد العريس بِسَوِّي عَشَا لأهل العريس وقرايبه وكلّ النّاس الموجودين عند أهل العريس، ولمّا العالَم تِتْعَشّى بِلبَس العريس (وَهْدُه) عند المعزِّب في داره، وبِلتَمُّوا أهل العريس وأصحابُه وقرايبُه وبِزفُّوا العريس من دار (المعزِّب) لَدَار أهل العريس وهُمَّه بِغَنُّوا وبِهِيجنوا.

ومن هذه الأغاني:

تلُولَحِي يا دَاليهْ                           يامّ غْصُون العَاليهْ

تلُولَحَي شِبرين وطُولْ                    تلُولَحي مَقْدَرشْ أطُولْ

والنّبِي صلُّوا عَليهْ                        وَاعَلَيَّا وَا عَليهْ

وَاعَلى مَن زَار قَبرهْ                     وَاعَلى مَن حَجّ لِيهْ

وقبل ما يدخُل العريس على عروسه بتقدَّموا الشّباب وبتحاوَطُوا العريس وبُضُرْبُوه مِشَان يكون زَلَمة وقلبُه قَوِي في داره.

وعادة ضَرْب العريس مَوجودة، والنّاس كُلّها قايمة فيها.