نَهار العُرس أو الإكليل بِتجي العروس بتِلبَس لِبس العُرس، وكان اللِّبس (حَطَّة) مِثل السَلطِيّات بِتخَيِّطها مع منديل صوف من ورا، وبُغُزُّوا لها ريش نعام وسط راسها، وإذا المحلّ بعيد بتِركَب على جَمل وبتِركَب وراها وَحدة تِمسِك لها الرِّيش.

وبِيجوا أهل العريس (القطار أو الفاردة) مِشان يُوخذوا العروس، وبِكونِن النِّسوان لابسات عبايات ملوّنة وثياب مطرزة، يعني كلُّه لِبس مرتَّب، وبِكونِن يغَنِّن:

وافتحِلْنا الباب يابو فلان

وَهِلْنَا غِيّاب، والشّمس حرقَتْنا

جِيناك جِيناك جرّارات لِرْدَانِ

وِدْنا عَطَاك يا جْوِيعِد الخَال

وبِفَوّتوهم أهل العروس وبقوموا في واجبهم وبضيفوهم قهوة سادة وقِرفة وحِلو إذا فيه، وبِيقوم عَمّ العروس وخَالها وأبوها مِشان يقَوّموُها ويحطُّوا في إيدها مصاري، وبِيجن النِّسوان بِوَقّفن وبِهَاهِن في العروس وبِقُولن:

فِزِّي على حِيلك وخَلّي هالعادة تموت

يا شجرة المَستَكة، وِطْرَافها ياقوت

واحنا بنات الأصايل، وأصِلْنا مَثبوت

وَجْدَادْنا في المقابر، يِستاهلوا التّابوت

وبِتجي العروس بسْ تصير على الباب وِدها تِطلع من الدار يقومن الحبايب والجارات النّسوان الموجوات بِوَدّعن فيها، وبقولن:

تَرى  فلانة ودَاعِتُكو              ودَاعَة خِيرٍ مِنكو

جَمَل فلانة يا عَمّي              وعِندُه مَنْقَع الدَّمِّ

جَمل فلانة يغنِّي فنُون            ويزيد المبفضات  جنون

جمل فلانة يناجُونه              وعن القِرية يرُدّونه

ويوخذوها ويروّحُوا فيها لدار العريس، وكانون يكلِّلوا في الدار زمان، وهناك بِرحّبوا فيها ويستقبلوها. والأيام هذه العرايس بِلبَسِن بدلات عُرس وطَرْحَة، وبُوخذوها في سيارة مزيّنة بالورد، والصلاة بتكون مزيّنة في الورد والشبر، ويادوب يغنِّن عندها كم أغنية إذا كان فيه كبار بِعرفِن يغنِّن، وصاروا بعد الإكليل يُوخذوا العروس على قاعات مشان يِعملوا حفلات.  وكل شي هالأيام صار وِدُّه مَصاري؛ يعني العُرس بدُّه ميزانية، عشان هيك بتلاقي الشباب مو كثير متشجّعين على الجيزة.