***

هي من أقدم وأشهر العادات والتقاليد عند البدو في الزواج.

كيف تتم طِلبة العروس؟

يقول الحج عبد الله العطِوي : لمّا وِدنا نطلب عروس لواحد من الرجال نجمع بعضنا جاهه (كلنا شيوخ العشيره والوجوه والقرايب)، وأغلب الرجال في الجاهة يلبسوا العبايات فوق الثياب، ونروح على بيت أهل العروس ونسلّم على الناس، ويقدّموا إلنا القهوة، شيخ الجاهة يمسك الفنجان ويحطّه على الأرض.

يقول أبو العروس: ليه ما تشرب قهوتك يا فلان؟

يردّ شيخ الجاهة: اِحنا جيناكاو طالبين إيد بنتكو الكبيرة او الصغيرة أو يسَمّوها باسمها أحيانًا لولدنا فلان (ويقول اسمه).

يردّ أبو العروس عليه؛ إذا موافق الجاهة تشرب القهوة، وإذا بالرفض ما يشربوا القهوة وبعدين يقروا الفاتحة.

ملاحظة:

رد أبو العروس على شيخ الجاهة هو: جَتْكُوا عطيّة ما مِن وراها جَزِيّه.

***

الطِّلْبِة أو الجاهة  بِتكون بعد ما يكون الشبّ تعرَّف لِيه على بنت أو ناس دلُّوه عليها، أو هو شافها وحَبّها، بِيجي الشبّ عاد يدوِّر مَراسيل مِشان يشُوف إذا أهل البنت بِعطوه يّاها أو هيه موافقة عليه، إذا شاف الرِّضا بِيجي أهل العريس بِحَضّروا جاهتهم؛ بتكون من وجوه البلد وكبارِيّتهم ،يعني ناس زِينين ما ينردّوا، ويِعطوا أهل العروس خبر عن موعد الجاهة لأنّه لازم يكون فيه خبر مسبق إنّا جايِينكوا جاهة لفلان العلّاني، وبس تصل الجاهة يكون عاد أهل العروس في استقبالهم؛ بِلاقوهم على الباب أهل العروس وقرايبهم والكبير اللّى هُمّه كبّروه مِشان يِستقبل الجاهة. وبعد الحديث العام والتّرحاب والتهِلِّي في الضيوف بِيجي صاحب البيت يصُبّ القهوة للجاهة، وبحطّوا فنجان القهوة السادة قدّام كبير الجاهة. يبدأ الكلام اللّي وِدّه يطلب بعد المدح في أهل العروس والمحبّة في قرُب النَّسَب في إنهم أجوا يُطلبوا إيد بِنتكو فلانة لابنّا فلان، وإنّه بيرغب في قُربكو أو نَسَبْكو، وإن شالله ما ترجعونا خايبين. بِرُدّ عليه الزَّلمة اللّي وَكَّلُوه إنّه يرُدّ: (اشربوا قَهوتكم، وأهلا وسهلا فيكو، وبنِتْشَرَّف في نَسَبْكو، وألف مبروك).

وبَسْ يِشربوا القهوة، ويضيّفُوهم الحِلو، يِبدوا في الحديث عن مَطالب أهل العروس من ذَهَب وِجْهَاز وأثاث وكل إشي يِلزَم العرس، ويحدِّدوا موعد الخُطبة والعرس ومَهرها.

وفي العادة يكون وقت جَيّة الجاهة على أهل العروس المسا، وبكونوا أهل العريس يِعزموا على الغدا مشان أهل العروس يِجو يتغدُّوا عندهم، لأنّه واجب وِدْهُم يردُّوه، وإذا أبو  العروس وأهلها ما كثّرُوا الطلبات على أهل العريس عند الجْهَاز بتلاقي أهل العريس يِكِرموهم ويْقَدّروا هالإشي ليهم.