كانت العروس بعد ما تخلّص السّبوع وتروح تزور الصلاة؛ لأنه زيارة الصلاة أهم إشي لأنه ما يصير تروح على أي محل قبل ما تروح تزور الصلاة، ويصلّي عليهم الخوري وبِكونوا مجهّزين مشان تزور أهلها هيه وعيلتها وخَوات جوزها وسلافها، وكل اللّي وده ياهم يروحوا معهم على الزوارة.

بس تروح على الزيارة لازم أهل العريس يوخذوا معهم كل لوازم الغدا من ذبيحة ورز ولبن وجميد وسمنة وكل إشي بلزم في الغدا، ولازم أهل العريس هُمّه اللّي يطبخوا الغدا ويجهزوا، وأهل العروس بكونوا كأنهم ضيوف وبحطّوا الغدا وبتغدوا وبروّحو، بس قبل ما يروّحو بكونوا أهل العروس مجهّزين إلها زوارة. في العاده الزوارة بتكون مهمة؛ زمان كانوا يزوّروا العروس يا غَنم أو بقرة أو ذهب، أما هالأيام هاذي صار ذهب أو أثاث للدار من كنابايات وغسّالة أو أي إشي بتكون العروس مقرريته من نواقص دارها؛ لأنه هالأيام كُل شي صار غير، وبتوخذ زوارتها وبتروّح، وبتصير عاد تطلع من الدار في أيّ وقت بدون ما يكون عليها قيد؛ لأن زيارة الصلاة والأهل أهم إشي بعد الجيزة.