بِقومن نساء القرية وبِجِن على دار أهل العروس، بجيبن كل إشي بِلزم لحمّام العروس من ميّة ياخذنّه وصابونة وليفة وكل إشي بِلزم، وبعد هيك بِعملن حوالي العروس حلقة؛ ووحدة بتصُبّ الميّة، ووحدة بتفرك. وبس يخلّصن بتيجي وحدة بتمشّط العروس، وتكحّل عيونها وبتلبّسها فُستانها، وبِجَلّلنها على فرشة، وبِقومن يغنِّن عليها.

ولمّا يِجي القطار (الفاردة) يجي خال العروس أو أبوها بِطلعها وبِركّبها بالسيارة، وخالها بِطلُب من أبو العريس (تِسعة الخال)، وبلتمّوا قرايبها على السيارة وبنقّطوها، وبِطلع مع العروس خَواتها وعَمّاتها وخالاتها وبناتهن، ولمّا يصل القطار بكونوا أهل العريس مجهّزين عشا لقرايب العروس وبتعشّن عليه.