نَقُوط العروس بِبَلّش بس أمّ العروس تِعزم نِسوان القرية، بيجِن النّسوان وكل وحدة معاها شويّة طحين محطوطة في صينية من النّحاس، وكان كل وحدة منا عندها صينيّة من النحاس مِشان هاذي السّواليف، وفي نُصّ الطّحين بنحطّ صحن فيه شويّة سكّر أو لبَن جَميد أو شويّة سمْن بلدي، وبنعطيه لأم العروس، وهي بتِعطينا بداله في نفس الصحن شويّة حلو أو عِنَب أو تِين وقِطعة قماش ملوّنة بنقول عنّه مَنديل أو إشار، بتحطّه النّسوان على رُوسهن.

والعروس بس تِطلع من بيت أهلها اللّي بِطلِعْها خالها إذا أبوها ميّت أو طالع برّا، وبتوقف عند باب البيت وبِبلّشوا الزُّلم ينَقّطوها، وبيجمعوا النّقوط اللّي هو تِسعة الخَال، وبكون النّقوط من أخوالها كلّهم، وبس يجمعوه مع كبيرهم، بيقدِّم الخال النّقوط على قَدّ ما يكون (100) نيرة أو إن شالله 5 قروش، بقدِّم أبو العريس مثلهن، وبصير الناس بعدين ينقّطوا، وبعدين بتِطلَع العَروس والنّسوان بِغَنّن:

يِخْلِف على أبو فلان             يخلِف عليه الأول

طَلَبْنا القُرب منّه                أعطانا غزال مصوّر

وكمان بِنغنّي:

اِطْلِق جَمَلنا يسير يابي الوَلَد اِطلِق جَمَلنا يسير

ما يليك عَثِير وبقدرة الله ما يليك عَثِير