الله ومحمد رسول الله أخو إلِي دخل وأقرَن على ناقة، كان العرس زمان أكثر من أسبـوع، ها كيف؟ والحجّ خليف (الله يرحمه) ذبح للناس أربعين عَبُور (يعني خروف).

وقَبْل العروس مثل بنت عبد الحميد وِدها تُدخُل، بِيجن هالنّساوين وبجيبن ليها معهن بليه (قرنفل) وبحطنّه في صدرها، وبُحُطّن عطر وبِحَنِّن أدِيها بالحِنّة الزينة، وبرسُمن عإديها ورود، وبِشَكشْكِنها، وهيّه يومن يجي القطار (الفاردة) بِحُطّن القطّارات (النسوان) وبغنن للعروس:

يِخلف على ابو فلان             يخلف عليه الاول

طالبنا النسب منه               أعطانا غزال مصور

يخلف على ابو فلان             يخلف عليه الثاني

طالبنا النسب منه               أعطانا ريم الغزلاني

وبيجو أهل العروس وبغدُّوا القطار كلّه وبذبحوا الخرفان وبنقطها. وقَدّ ما بِدفع الخال نقوط مثلا 20 دينار بيجي أبو العريس بدفع قدّهن، وبقضبها خالها وبقول (اطلعي يا خالو في معزّبكي)، وبتطلع العروس وبوخذوها عدار أهل العريس وبزفّوا العرسان وبغنوا ليهم.