الملوخية وكيف ننشفها، أول شي نشتري الملوخية من بكم الخضرة بكميات كبيرة.

نتفق مع النسوان، يعني الجارات، يا على الصبح أو بعد العصر نتجمع كلنا ونصير نفرط بالملوخية، ونكون حاطين بالنص زي ملف (حرام)، ونصير نسولف ونعمل كاسة شاي وما فيه أحلى منها بحوش الدار ومنها نتسلى.

بعد ما نلقطها ونفرطها نأخذ كل الملوخية ونحطهن بشوال البصل ونربطهن، ونغسلهن كثير منيح بالمية وننشفهن بنشافة الغسالة، بعدها نطولهن ونفردهن على ملف أو حرام بالشمس، كل يوم نقلبهن حتى ينشفن ويجفن.

بعدها نجيب منخل ننخل الملوخيات، أو على ايدينا نفركهن، بعدها بنحطهن بكياس نايلون ونحتفظ فيها لما نطبخ، في ناس بجيبها خضرا، هاظ لما نكمل تغسيل ملوخية نأخذ شوية نطبخها خضرا يا على ورقها أو نفرمها ناعم وتنطبخ، وهيك تنشف الملوخية.