بنشتري لبن من اللبان كل يوم الصبح بكير على البراد، أو كل يومين مرة كميات كبيرة، بنعمل جميد بكميات، بندير اللبن بخرايط القماش الكبيرة، وبنحطه بمكان مرتفع عن الأرض شوي حتى ينزل المصل منه، بنتركه ساعة زمن وبنطل عليه باليوم أربع خمس مرات على بين ما ينزل المصل منه، وبنحط أحجار حجم كبير فوق الخرايط حتى يمصي من المصل ويجمد اللبن، وثاني يوم أو ثالث يوم بنديره بجاطات كبيرة، وكل جاط كبير بنحط عليه كيس ملح وبنعجنه مليح، وبنقرص اللبن الجامد، وبنكون مجهزين جاط صغير بيه ميه بنغط ايدينا بالمي بنملس وجه قرص الجميد، بننشره على طاولات بالجرايد على شان تتمصي المي من أقراص الجميد، ونفرش فوقيها شريطة بيضا نظيفة، وبعدين بنصف أقراص الجميد عليها لمدة يومين أو ثلاث، بنظل نغير الجرايد على بين ما تنشف القراص من المية، بعدين نقطع الجميد قطع وهو طري قبل ما ينشف مليح أرباع أرباع، (كانوا زمان لما ينشفوا رأس الجميد يكسره بالشاكوش أو الحجر)، وننشر الجميد المكسر على معرشات عاليه نعملهم خصوصي للجميد، بنظل نقلبهم خلال النهار لمدة ثلاث أيام أو أربع أيام حتى ينشف مليح، وبننزله عن المعرشات ونخزنه.