يا نجـــم ياللي عن سما خافقي غابْ

وش غيبتـــك عن الخفوق السماوي

مدري بدون أسباب ولا اية أسبـابْ

وإلا إنهــــــا كانــت مجرد حكاوي

الأوله يبغى لها شــرح وإسهــــابْ

 والثانيــــــة تحتـــاج منك فتاوي

والثالثة صدمة وتفريقـــة أحـــزابْ

بلــــــوى ولكن غير كل البلاوي

يا صاحبي ما لي هينا غيرك أصحابْ

بعيــــــون قلبْي والضمير الشقاوي

لو شفتنـي حيث تذكر بين الأجنابْ

وربعــــــي براسي يبعدون الهقاوي

تراي أعيش بفيتك عيشة أغــــرابْ

وأعـــدِّد للذكرى زمـــان الخلاوي

راسي من التفكير يا صاحبي شــابْ

تركتنـــــي لجور السؤال اللحاوي

معقولة اللي مضى نظرة إعجـــابْ

 معقولــــة اللي مضى طيش غاوي

لا مستحيل لا ويسلم الأحبـــــابْ

لان الهــــواوي مالــــه إلا هواوي

تعبت من التفكير عن روضه اهتـابْ

وجيتـك وأنا كلي خضوع ورجاوى

ما أنساك لو تنسى (عنزة) هيبة عقابْ

ولــــو نسيت عيبة فعول العطاوي

وإن كانت زلة ورمح النـــدم صابْ

وحيـــرت ترجع بس قلبك حياوي

تعال والبــس بالدجى قلبي أهدابْ

وانسـى وأنا بنسى بالقلب القساوي

الشاعر : سعد خديوي