ليالي العرس:

(تعاليل العرس، كنا نتعلل بعدوات العريس لمدة أسبوع قبل العرس، وكل ليلية بليلتها، بس هسع اختصروها سهرتين أو سهرة، يعني يومين قبل العرس، يكون عاملين صيوانات للزلام والنسوان بدار أهل العريس، يجن هل النسوان والصبايا وخالات وعمات العريس يغنن ويهاهن، والزلام يعملوا دحية ودبكة، أو يجيبوا فرقة، ونوزع شاي وراحة وحلو على سدور، والقهوة السادة، وكنا نعمل حنة جاهزة بنحطها على سدر وفيها شموع، ونوزع على النسوان بصرة حنة ناشفة لكل وحدة، وتأخذ السدر أم العريس وأخواتها وعمات العريس وبناتها يروحن على حنة العروس ساعة زمن، بعدها يروحن على سهرات العرس، وتكون سهرات العريس تعاليل للصبح، والنسوان يفرشن هل الفرشات الصوف، والكراسي جوا الدار على البلاكين، وكانت أم العريس تجيب قماش، وكل أربع متار تقص وتوزع للنسوان شقف قماش مع كيس حلو وراحة، وكانوا يوزعوا رز بحليب، بعد السهرة يعملن مناسف للفرقة وصحاب ابنها وللنسوان اللي ظلن ببيوت العرس، وعمات العريس وخالاته وولاد خواله وخالاته وصحابه للعريس يناموا عند العريس، زي تعاليل بعد السهرات للصبح، وفي ناس تنقط بليالي السهرات، وطبعا نعزم الأصحاب واللي يحبك يجيك).