طلعة العروس:

(طبعا تكون طلعة العروس أبكر من سهرتها بالوقت، تكون بعد العصر مباشرة، يعني بعد الأربعة، وكمان تكون مجهزة حالها رايحة على الصالون، ولابسة فستان، وتنصمد بدار أبوها على لوج، وييجن نسوان الحارة وجاراتها وخالاتها وعماتها وخواتها يودعنها ويغنلها على الطبلة، أم العروس توزع القهوة والمي، والنسوان ينقطنها عند طلعة العروس، أو بنقطن العروس، ويستنوا أهل العريس يجوا يأخذوها من دار أبوها، وكمان إذا أهل العريس عاملين غدا يلبسوا العروس ذهبها بدار أبوها، وأبو العروس وإخوانها يلبسوها الذهب كل واحد قطعة، يا خاتم وسوارة أو طوق، أما إذا كان أهل العريس عاملين صالة، يأخذوا العروس على الصالة، وهناك يلبسوها، وأهل العروس كمان هناك يلبسوها الذهب، وإذا غدا بس تطلع معها أمها، وعماتها وخالاتها وخواتها يلحقوها على بيت أهل العريس، أما إذا صالة كل الناس تروح على الصالة بتحضر).

(ولما يروحوا العرسان، أمها أو وحدة من خالاتها وعماتها يروحن معها، وأهل العريس يطلعوا عباءة خال وعباءة عم، يا قبل الطلعة بيوم، يا يوم طلعة العروس الصبح، وتكون يا عباية يعطوها، أو مصاري حق العباية، قبل طلعة العروس بأسبوع تأخذ أم العروس جهاز بنتها وتوديه لبيت العريس، قبل كانوا يودوه الصبحيات، وينشرنه على الحبال حتى كل الناس تتفرج عليه، عشان يشوفوا جهازها، وإنه يتباهن بيه، أما هسع لا).

(وكانت أم العروس تودي صندوق، هاظ من أبو العروس، صندوق خشب فيه طبية، يعني صرة قهوة وجبنة وبهار وكحل ومغزل صوف وشراشف مساوية على الإدين، ووجوه للحف ومخدات، هاظ من أبو العروس، بس هسع ما فيه ناس يعملوا هيك).

(وطلعة العروس يطلعها أبوها أو جدها، يأخذها من الكوشة وينزلها لباب السيارة يعطيها لعريسها، وسيارة عرس مزينة وكلها ورد).

(ولازم أهل العروس ما يكنسوا الدار أو يشطفوها إلا بعد الطلعة لساعتين أو ثلاثة عشان ما تكنس أو تنطرد من دار أهل جوزها).