الغداء يوم العرس

(غداء العرس، يكون أهل العريس من بعد الفجر يحضرون اللحمة بعد ذبح الذبائح، وشباب العيلة وصحاب العرس يكونوا نايمين عند أهل العريس، يقوموا على هل صبح بعد الفجر ويعاونوا أهل العريس يساعدوهم، طبعا في طباخ يكون وهل طناجر الكبيرة، وبصيروا يطبخوا المناسف هل للحم وهل رز واللبن، ونسوان نفس ايشي يقومن الصبح يحضرن القهوة ويحضرن اللوز بعد ما تنقعه يقشرنه لما يخلصن يودنة للطباخ، ونسوان وام العريس تطبخ على الصبح فطور للموجودين، المعاليق ويحطن مع تشقيح خيار وبندورة ورايب وخبز، والغدا دايما بعد صلاة الظهر يوم الجمعة، تتلم الناس الزلام والنسوان بالبيوت، لما يجو الزلام أول ما يدخل يروح ينقط، يكتب اسمه عند الواقف على النقوط، قبل كانوا ينقطوا عشر قروش، ونص دينار، ويصير يعلو الصوت فلان ولد فلان نقط كذا، اما هسع لا بس ينقط هو ساكت).

(ونسوان ينقطن أم العريس، لما يلتموا الناس أول ما ينزل الغدا يصيروا يطخوا، ونسوان تهاهي وتزغرد، وشباب العيلة يكون هما حاملين مناسف ببلشوا يفوتوهن على الناس، وطبعا يكون أبو العريس مودي سدرين مناسف أو ثلاثة عند أهل العروس).

(يصيروا الناس يتغدوا، بعدها في بيبسي، في ناس بعد الغدا توزع حلو، أو يخلوا الحلو لما يجيبوا العروس وبصمدوها بالبيت، طبعا الغدا مش بسرعة بنزله، يعني ناس تيجي من صلاة الجمعة للبيوت، وناس تنقط، يقعدوا نص ساعة وبعدها ينزلوا الغدا، ومهاهاة:

هي يا ناس صلو على النبي      هي صلاة بصلاتين

هي صلاة لمحمد          هي صلاة ترد عن غدانا العين).