عود الحراثة:

 (تحرث الأرض بعد بذر الحب القطاني عدس، كرسنة، حمص، وتحرث البساتين بالمحراث المصنوع من الخشب من شجر البلوط أو السنديان حتى ما ينكسر ويكون صلب، يجره فدان "زوج من البقر" أو فرس غير أصيلة "كديشة"، وعود الحراث هو من عود الخشب طويل بآخره مستطيل من الخشب تركب عليه سكه الحديد اللى تكشف التراب بالحقل.

والكابوسة: وهي اللي بمسك فيها الحراث ويضغطها بيده حتى تصل سكة الحديد بالتراب، ومرات برفع العود منها إذا اعترضه حجر أثناء الحراث.

والعود: قطعة خشب قوية تصل السكة لقدام "إلى الأمام" وتسندها بالناطح والنير، وهو عود خشب مخزوق "مثقوب" على كل رقبة الدابة، هو اللي يركب على رقبة الدابتين ويمسك الفدان حتى يتحركن بمستوى بعض، والشرعة اللي تربط رأس العود مع النير بمجولة من الجلد، حتى يجر الفدان العود بدون صعوبة، وبالذات لما يلف ويستدير الفدان بالدورة.

والمنساس: موجود مع عود الحراث، وهو عصا يمسكه الحراث، وبراس العصا "البلعة" وهي قطعة حديد مستطيلة الراس حتى يوجه الحراث بيها الدابة، وبيها يقيم التراب الجامد من السكة عشان ما تليط السكة، وكل موسم نودي هالسكة اللي من حديد للجلخ حتى تخش بالأرض اليابسة، وصار هالايام يستخدم مشط الحراث كله من حديد، بدل السكة الوحدة صارت سكك، وعود حراث من حديد).