خير السنة:

(طعمة السنة، تكون من اللي زارعته عندك بباب الدار أو بالمزرعة، كل شجرة الها موسمها، زي اللي قدام الدار، شجر منوع زرعناهن: خوخ، مشمش، دراق، رمان، تين، ليمون، اسكدنيا، ميرمية، نعنع، شجر الغار، تفاح، عنب، أي شجرة تستوي وتطعم انلقطها كلها ونوزع على الجيران منها، ونقول هاي من خير السنة لكل بيت من الجيران اللي حوالينا، مش شرط الكمية كثيرة، يعني يا دوب صحن، المهم الطعمة، وكمان لبناتي أودي لهن أطعمهن من شجر بيت أبوهن، وكمان هم جيرانا عندهم شجر، حتى لو عنا مثلهن بودوا لنا وبطعمونا، وهاي العادة كل الناس بماحص بعملوها، مش للشجر بس، كمان للعشب زي الميرمية، وزيت الزيتون، ونعنع، والغار، وإكليل الجبل، وفرفحينة، وخبيزة، وورق العنب الدوالي.

زي ما بتحكي بنرد نفسهم، انو شجر بكون قبالهم ويشوفوه، وتكون النفس تشتهي، احنا من باب طعمة السنة أو خير السنة.

وهاي العادة حلوة، تعلمتها من أمي الله يرحمها، لأنها تحبب الناس ببعضها، وتقوي علاقات الجيران، لانو الرسول عليه الصلاة والسلام وصى على سابع جار).