استمارة رقم 65

الجميد او المريس هو اقراص لبن جامد مصنوع من حليب الغنم والمعز المغلي، وبعد الغلي نبرده لحد ما يصير فاتر ونحط فيه لبن رايب عشان نروبه ونتركه لمدة ساعه الى ساعتين لحد ما يصير لبن رايب وبعدين نحطه باكياس لبن خاصه باللبن تكون قطنيه تمرر الماء من خلالها عشان تتصفى كل المي اللي باللبن الرايب ونصير نقلب الاكياس كل يوم وننظفهن من برا عن اللبن المتصفي عليهن ونحط عليهن اشي ثقيل مثل الحجارة عشان تضغط عاللبن اكثر ويتصفى من المي اسرع وهيك يضل اسبو او اكثر لحد ما يصير اللبن مثل اللبنه خالي تقريبا من المي ، ولازم نحط على اكياس ملح من برا عشان تطلع المي اسرع وبعد ما يصير لبنه نطلعه من الاكياس ونمد قطعة قماش ونسويه زي الاقراص ملح عشان يحفظه من العفن ونتركه فترة 3-4 اايام بالشمس لحد ما يصير ناشف وقاسي ونحطه بكيس ونضبه لوقت الحاجه والمريس نستخدمه لما ودنا نساوي منسف، نمرس المريس بمي دافيه نفركه بيدينا لحد ما تصير المي عليها لبن ونحطه على الغاز مع اللحم ونغليه لحد ما يستوي اللحم .

والمريس البدو يسوونه بالصيف عشان ياكلونه بالشتوية لما ما يكون فيه حليب بالغنم  

استمارة رقم 67

بعد خض اللبن والرائب يتم وضع الشنينة في الخريطة والخريطة (قطعه من قماش) تخيط على شكل كيس يوضع فيهما اللبن لصناعة الجميد والقطيع بعد وضع اللبن في الخريطة يربطهما من الاعلى ثم توضع على صفاة . الحجر وتركس اي يوضع فوقها حمل ثقيل عادة ما يكون حجر حتى يتم تصفية الشنينة من ( المصل) وهو الماء الذي يخرج من الشنينة .

يترك في الخريطة لمدة لا تقل عن اسبوع حتى يتجمد اللبن ويخرج الماء الوجود فيه ثم يخرج من الخريطة يوضع في إناء ويوضع عليه الملح بكمية كبيرة ( والسيب في اضافة للحفاظ على الجميد من التلف عند تخزينه ) ثم يتم عجنه اللبن الجامد مع الملح ثم يقطع شكل اقراص ويوضع على قطعة قماش وينشر تحت اشعة الشمس المباشرة ويحتاج ليجف مدة تقارب الاسبوعين يتم تقليب الاقراص كل يومين تقريبا ثم يوضع في الخريطة ويتم تعليقه بعيدا عن الرطوبة الى حين استخدامه .