عملية الطهور للمولود الذكر يتم بأول اسبوع إلو من ولادته هيك الشائع والتعرف عنا بالمجتمع بس عملية الطهور للولد ما الها وقت محدد بصير يطهر من اول يوم ولادته ولحتى يكبر بس الافضل انه يتطهر وهو صغير عشان ما بصير عنده امراض لما يكبر وأفضل موسم للختان اذا ما بدهم اهله يطهرو بأول أسبوع هو زي ما بنحكي "لما يبرد الحجر" يعني يكون الجو بارد لانو الولد لما يطهر بفصل الصيف أو بأوقات بتكون درجة الحرارة عاليه يمكن يصير معاه التهاب بمعنى ثاني "تصنج عليه" طبعاً أول اشي بقعد الولد على تخت او سرير بكون صغير مش حجم السرير كبير ويرفع الشنته وبجهز العدة للطهور وهي الموس والسبيرتو اذا كان الولد صغير يعني بأول اسبوع بخلي ابوه يثبته ويمسح الموس بالسبيرتو وبشيل الجلد الزائد الموجود على رأس ذكر الولد أما اذا كان الولد واعي يعني بعمر سنتين أو أكثر بخلي ابوه يثبته بإيده من ورا وبفتح رجليه وانا بكون مجهز الموس وماسحه  بالسبيرتو ونحكي للولد العباره"شوف العصفوره" وبأشر بإيدي على السقف ومجرد ما الولد اطلع على السقف بشيل بسرعه الجلد الزائد الموجود على رأس الذكر وبعدها بلف ذكر الولد بالقطن والشاش وبرش عليه رشوش وبوخذه ابوه لامه واخواته وبصيروا يغنوا إلو  ويداعبوه وبصيرو يبوسو فيه على جبينه.