بتختلف معاملة الانثى من عيله الثانية لأنه اذا اجت البنت بعد الولد (ذكر) يعني اذا كان ولاد قبل البنت الاهل بيرضوا فيها وبنبسطوا انه اجتهم بنت بس اذا اجت البنت وكان في قبلها بنات كثير بعاملوها معامله سيئة ومن المصطلحات يلي بحكوها  قلة هلا، عقاد الرقاب. وممكن ينصحوا الاب انه يتزوج وحده ثانيه عشان تجيبلوا الولد. وبعد شهرين من ولادتها بخزقوا اذنها واول شي بتيجي الدايه او وحده من النسوان الكبار يلي بفهموا بالأطفال وبنفرك اذنها فرك شديد وبتحط عليها السكن وهو الرماد البارد عشان تخدر الاذن وبتطهر الاذن بالعطر وبعدين يخزقوا الاذن بإبره نظيفة وبحط بالخزق خيط لفتره معينه بعدين بحطولها الحلق وبالعادة يكون من فضه واله سانسل او يحطولها عود القرنفل عشان يلتئم الجرح. وبالعادة بطعموا المرأة يلي بتخلف بنات لحم عجل عشان تبطل تخلف بنات وتسير تخلف اولاد وبلحظة ولادة البنت بحكولها الله يحميها بثوب الستر ومن الامثال يلي بحكوها عن ولادة البنت هم البنات للممات واذا ماتت المولودة بحكولها موت البنت ستره من العبارات يلي ممكن يحكوها النسوان لما تنولد البنت البنت لو انها قد المخدة بس يتنزل على الدار خمده.