لما يموت واحد من العيله ان كان زلمه أو مرآه ثاني يوم من وفاته يقوموا النسوان مثل أمه للميت وخواته وعماتو وخالتو وزوجته اذا كان متزوج بروحوا ثاني يوم بكون الميت مدفون بروحو بزوروه بالمقبره وهاي الزياره بنسميها فكة الوحده بتكون النسوان لابسات اسود يعني دليل على الحداد وبقعدوا حولين القبر وبقرءوا قرآن وبدعولوا وبصيروا يعيطوا وبدعولوا بالمغفره والعتق من النار ومدة القعده عند الميت مقدار ساعه وسبب تسميتها فكه الوحدة لانو الميت بكون وحيد بالقبر فبروحوا النسوان نفكوا الوحده عندو ويدعولوه ومن العادات المصاحبة الفكه الوحده انو النسوان بوخذوا معهم وهم رايحين على القبر قراص مخمره أو كعك أو أي اشي حلو وبصيروا النسوان يوزعوا على الناس الموجوديين بالمقبره عن روح الميت وهاي العاده قديمه من زمان انا تعلمتها من امي وخالاتي لما رحنا فكنا الوحده عند سيدي أبو أمي ولسه هاي العاده هسه بنمارسها وفي ناس بتمارسها بس مش زي زمان يعني لانها باعتقاد بعض الناس انو هاي عاده مش وارده بالدين ويعتبروها زي البدع.