المعروف دايماً عنا في المجتمعات المحافظة أنه الشب بيجي يطلب البنت، بس كان زمان عند البدو ما فيها عيب إذا البنت خطبت الشب، بس البنت ما بتروح مباشرة عند الشب وبتحكي معو قبل يكون في معرفة بين العيلتين، وبعجبها الشب، وبعجبها شجاعته وكرمه، بتروح البنت بتبعت رسالة عن طريق صاحباتها إذا بعرفوا اخواتوا أو عن طريق واحد من صحابه، وبحكولوا أنه فلانة بدها تتجوز منك، وطبعاً البنت ما بتشوف شيء عيب بهذا الشي لانه طلبها للزواج منه يعتبر تكريم إله، وتشريف لعيلته أنه يتجوز من بنت شجاعة وقد حالها، واحياناً بتعطي الشعراء أخبار عن جمالها، وبروحوا الشعراء يمدحوها أمام الشخص يلي بتحبه يتغنوا بمحاسنها قدامه بطريقة مقصودة، أو يقول الشاعر "يبلاك بحب فلانة"، والشب بوقع بحبها قبل ما يشوفها، وعلى رأي المثل اللأذن تعشق قبل العين أحيانا، وكثير من الشباب كان يوقعوا بغرام فتاة وبتعبوا بالفراش وإذا ما نفع معهم الطب الشعبي كانت تيجي عجوز تزوره وتحرق قضيب من الحديد قدامه وتحكيله إذا ما بتحكي الحقيقة بكوي أي جزء من جسمك بالحديد، وبعد ما يحكيلها يطلب منها كتم سره وتساعده بالزواج بالبنت يلي بحبها.