بعد العرس بتوجهوا العرسان للبيت بجهزوا حالهم وشنتاتهم واغراضهم عشان يسافروا لبلد معين يقضوا فيه شهر العسل، وبتكون العروس قبل ما تسافر ضابه ذهبها ونقوطها من العرس عند أمها، وبكون العرسان متفقين على المكان الي بدهم يقضوا فيه شهر العسل قبل العرس، وبسافروا على البلد الي هم اختاروه، ومش شرط شهر العسل يكون شهر كامل ممكن يكون اقل، وهذا بحدده العرسان، وشهر العسل بكون إما على حساب العريس أو بكون نقوط من أبوه  أو أخوه أو أخته، والمكان بكون مش بعيد كثير يعني بروحوا على مناطق حلوة، انا اخذت مرتي  على اسطنبول وقعدنا هناك اسبوعين، وبشهر العسل بتكون الحياة الزوجية حلوة، وبصير بينهم حب أكثر، ومعاشرة حب أكثر، ويتعرفوا على اطباع بعض، وبتكون نفسية العرسان مرتاحة إنهم بعاد عن كل القرايب الي ممكن يزوروهم بأول أيام العرس، وبشهر العسل يلف العرسان بالمكان الي راحو عليه يعني يطشو ويشمو هوا في المكان، ولما برجعوا بتكون الفرحة كبيرة للأهل برجوع العرسان لبيتهم، وبتصير العروس تحكي لخواتها وأهلها عن الأماكن الي راحوا عليها وعن الفرحة الي كانوا فيها بشهر العسل ونفس الشي العريس بحكي لأهله وإخوانه، وهذا الي خلى شهر العسل من العادات والتقاليد الزوجية الحلوة والمهمة، والي بهتم فيها أكثر البنات.