صبة الدار:

(يعني مثل العرس، لما الواحد يبني بيت وأول بيت له بده يسكن فيه، يعني مش إيجار أو شقق سكنية، لما يكون فيه صبة للدار أكتب آيات التحصين وسورة الفاتحة وآية الكرسي بورقة أخلي زوجي يحطها بالأساس قبل الصبة).

(يوم الصبة بنعمل المناسف للي أجو يهنونا والعمال والجيران. ويوقفوا الزلام مع بعض وكل شباب العيلة، وولادي مع العمال ويصبوا هل صبة ويساعدونا بالمي والشاي، والنسوان يساعدنا بتجهيز المناسف).

(وبعد ما نخلص الصبة نزغرت ونهاهي ونغز راية بيضا فوق الصبة، وتنزل هل المناسف لأهل الدار والناس الموجودين، ونجيب حسب العمال ونوزع للجيران، ونوزع المي والبارد ما في أحلى منها).

(وطبعاً الناس اللي حضرت الصبة من عاداتنا يجيبوا شوال سكر أو رز، أو تنكة زيت وتنكة جبنة، وفوقها ينقطوا على الصبة ويباركوا لنا، وبعد الجَمْعَة نعمل كاسة شاي نقعد. لحد الآن هاي العادة موجودة، فيها بركة).