إكرام الضيف

(احنا عندنا إكرام الضيف من عاداتنا اللي تعودنا عليها، والضيف هو اللي يجي من مكان بعيد، ويمكن يكون مرار طريق أو لحاجة عند المعازيب وأصحاب البيت، حتى لو كان الضيف عدو، ما دام إنه نازل أو داخل بيت مضيفه لازم يكرمه ويقدموا للضيف الميسور).

(لما يجي الضيف لبيت المعزب يكون الكل يهتموا بيه، كل واحد حسب ما مكانته بالعيلة، المعزب هو اللي عليه حق الضيافة عنده، لما يكون للمعزب عندو واحد يشتغل أو حد معه من عياله يقوله يا ولد قوم اربط فرس الضيف ويقول يا هلا بالضيف، ساعة ترحيب للضيف، ويهلي ويرحب بالضيف، ويربط فرسه، ويعلفوها، يضعوا لها أكل شعير أو تبن، نعم كانوا يهتموا حتى بالدابة اللي راكبها، ويربطوا الفرس إكرام إله، وما يعبسوا بوجهه، ويصبوا له القهوة، وإذا ما كانت جاهزة يحمس قهوة بساع، وبقدم له القهوة، والمعزب ما يحب طريا أن يذكر الفقر وعسر الحال قدام الضيف، وما حدا يتثاوب قدامه، ويتهاوش هو والعيال، أو يرفع صوته على مسامع الضيف، لأن هاظ مو من عوايدنا، حتى الضيف ما يحس إنه ثقيل دم، وإذا أجا ضيف وقت متأخر مع العصر بظل للمغرب المعزب بقول لأهل بيته ساووا حسب إمكانيته، إن كان مقتدر بذبح ذبيحة وبعزم اللي حواليه مع الضيف، حتى لو أكرم المعزب ضيفه لازم يتعذر عن التقصير ويقول له اعذرنا من التقصير، والضيف ما ياكل إلا المعزب يقول سموا، وبظل يهلي ويرحب).